دنيا وداني مواطيها ترفّعها والقرم يرقى بعزمه عن مواطيها
القرم يفرض عليها أمر واقعها يجرح دروبه لاجل يرجع يداويها
يرقى واذا ضاقت دْروبه يوسّعها ويعق فيها مع انّه ما طمع فيها
لان المطامع يثير الشك دافعها مثل الفَعَى يوم تسمع ناي حاويها
لا هو سمعها ولا قصده يسمّعها ولا قصده إلاَّ تناظر ميل راعيها
يطلع بطلعه ولكن ما يطلّعْها بعض المظاهر تزخرف لك مراميها
وشلون ألوم المظاهر والعذر معها والعقربي ما قدر يكشف لياليها
أهل المطامع تغطّي لك مطامعها والوقت يقدر يبيّن لك مغازيها
من حكّم الظن في الدنيا يضيّعها ومن حكّم العقل يكسب في تواليها
ومن أشعل النار لا يامِنْ مواضعها (النار ما تحرق إلاَّ رجل واطيها)
والنار أطفت وانا ما اريد أوَلّعها واذا ارجعت ولّعت أرْجَعْ واطَفّيها
والبسمه اللي لذيذ الزيف وزّعها أقرا مداها واترجمها وامشّيها
وِحْروف ما بين الاسطر سهل تجمعها لكن من الصعب تستوعب معانيها
قليل من يدرك الفرصه ويصنعها يجري بمبداه والدنيا يجاريها
بعض الفرص تغتنمني لاجل أضيّعها واصنع فرص تغتنم من طيب راعيها
هذا وانا اعزّ نفسي في تواضعها واقدّر الناس قاصيها و دانيها
والناس ما تحفل اللي ما يصانعها وتعيب في بعضها لو كان غاليها
تنسى وتذكر علوم اللي يطابعها واذا اختفى يختفي عن ذكر طاريها
تتبع خطا من هو يْحَاوِلْ يمتّعها وتقول ما لا تكنّه في خوافيها
والناس تشكي لحاميها مواجعها وشلون لو صار حاميها حراميها
الجمعة أبريل 27, 2007 12:52 am
